Woh Sunehrey Din

Eik arsey ke baad aaj hum ne apne college mein kadam rakkha. Manoos rahguzar aur dar o deewar banhain phailaii milay, mager naaashana chehron ko dekh kar dil ke kisi khamosh se goshey mein dard ki pehli rimak jaagi. Aaj hum khulee aankhon ke saath yadon ki parchaiyon sey milain gay. Dekhiay dil ke kon kon sey nakoosh ab bhi dilkash hain. College mein dakhil hotey hi barrey barrey sayadar darakht nazar aaye, jin ki chaoun mein najaane kitne keemti pal hum ne guzarey hain. Kabhi doston ke saath hanstey khailtey huay aur kabhi tanha, gudaz aur paraishaan. Mager yeh shajer humarey saathi rahe hain aur barson baad bhi yaheen humain khush aamded kehne ke liye dast basta kharey milain gay. badaltey mausamon mein chalo koi to hai jo humeesha humara muntazir rahe ga. Besakhta muskurahat aa gaye honton pe. Aur mader e ilmi sey pehla gehra rishta hum ne rakam kar liya.

canteen ke bahir kadam ruk sey gaye. KItne fursat ke lamhe guzrey hain yahan gupshup karne mein. Wahan class khatam hui yahan hum hazir. Koney ki eik maiz, doston ki bheer, dhair saari kitabein aur beshumar batein. Aaj bhi utna hi shor hai yahan. lagta hai keh jaisey zindagi raks mein aa jaati hai iss dehleez ke ander. Ajeeb baat hai keh dunya jahan ke khanon mein woh maza nahin paaya jo ward jaane sey pehle coke ke saath garam garam samosey mein tha. Humara dor itna bhi purana nahin, mager lagta hai keh umer ho gaye bhag dorr mein khatey peetay aur betukki batein kiye huay. yahan ki yadein bus ke sathiyon ke baghair adhoori hain. Chutte ke waqt bus ke intezaar mein hum ne yahan kitni sharartein kee hain. Bus ka safar aur saathi humain aksar gari mein aatey jaatey yaad aatey hain. Wohi rastey unke saath mukhtalif lagtey thai. Roraza ke iss safar mein juniors aur seniors ka eik doosrey ke saath eik khas rishta sa ban jaata hai jo umer ke fark sey mavra hota hai. bus mein safar karna eik anokha tajarba tha jo shayad phir humain naseeb na ho.


Lawn mein baithey huay naye talibilm bahar ki dunya ke rangon sey kis kader naashana lagtey hain. Kal hum bhi inhi ki tarha dosti aur rafakat ke lamhon mein magan thai. yeh nahin jantey thai keh dost badal jaatey hain aur apney bicher jaatey hain. kabhi socha hi nahin keh Kitabein uthaii, apne justujoo ki dhun mein aisi bekhayali phir kahan naseeb ho gi. Waqt shaoor daita hai to masoomiat jaati rehti hai. palkon pe chand aansoyon ki chubhan mehsoos hone lagi. Leejiay mohabbat ka pehla baab rakm kar liya dil ne. Yeh kaisey ho sakta hai keh In raston pe aane ke baad in rahon ke saathi yaad na aain. Kya dost kya dushman, kya apney kya paraii, eik hi rishtey mein bandhey hain sab. Eik daur ki karri jorey huay hai sab ko, aur yeh rishta waqt ke saath mazboot tar ho ga, tootey ga nahin. Kitne chehrey, kitni batein, kitne lamhey sab munjamid ho gaye waqt mein. Ab kisi zaman o makan mein woh sab eik sath nahin milain gay. Woh pal sirf humarey zehn mein zinda o javaid hain, hakeekat mein unka wajood nahin. Iss besakhta udasi mein hum ne eik harf e dua kaha apne tamaan doston ke liye, hamasron ke liye aur unke liye jin sey humara mohabbat ya murawwat ka koi rishta na ban saka. Shayad is baat ke eiteraaf sey humarey halqa e ehbaab ko hairat ho mager yeh such hai keh hum humeesha purane saathiyon ko yaad kartey hain... rafakat ka rishta dosti sey bhi gehra hota hai, kyunke is mein gham aur khushi donon shamil hain. Balke shayad hum apne rafeekon sey zayada apne rakeebon ke shukr guzaar hain, keh ager woh humain paraishaan na kartey to hum zeest par itni mehnat na kar paatey. Waafir mohabbatein humain bhi nakamma bana dalteen. leejiay iss khayal pe eik aur besakhta muskurahat khil uthii. Khuda salamat rakkhey humarey tamaan hamasron ko. Ameen.

yadon ke karwaan ka agla parao common room hai. Is khas kamrey ka koi shahana naam hona chahiye. Poorey college mein humaree aakhri panahgah yehi thee. Common room ki aapa ke paas kitabein rakhwani ho, namaz parhni ho, imtehaan ke liye parhna ho, faraghat mein gupshup karni ho ya tasveer kichwane sey pehle zara haalat sawarni ho to samajh leejiay ke yeh apna ghar hai. is ki char deewari ke ander koi bahir ka insaan nahin aa sakta. college magazine aur newsletter ke kitne kaam yahan baith kar kiye. Mushairon sey pehle yahan mehfil lagti thi jahan taaza kalam kaha aur suna jaata. Iss jagah sey humara eik aur khas rishta bhi hai. Hum ne SFPP ke saath bohot kaam kiya aur humara daftar bhi common room mein hi tha. Zara fursat mili aur hum dafter mein aan maujood hotey. Na jaane kitne zaroorat mand mareezon ke masail yaheen sey hal huay. Abhi bhi humain humarey doston ki hansi ki awazein sunaii daiti hain in dar o deewar mein.

Abhi mein apne khayalon mein magan thi keh kuch aashna chehrey nazar aaney lagey. College mein kaam kartey huay beshumaar log humaree yaadon ka eik eham hissa hain. Unki nazron mein pehchaan payee to hum ne khuda ka shukr ada kiya keh befikri ke dinon mein bhi hum ne in sab ko woh izzat aur khaloos diya jis ke woh mustahiq hain. Inke hunar aur mehnat ke baghair fj namukammal hai. Kitne kam naseeb hain woh log jo paanch chaiy saal yahan rehney ke bawajood in sab sey nawakif rahe. mein ne in sey yeh seekha hai keh izzat chahne sey pehle izzat dainee parti hai. Aur khaloos aur pyar kabhi bhi raigaan nahin jaatey.

Yadon ka sab sey beshkeemat baab humarey asataza ke naam hai. Unki mohabbatein aur khaloos humaree ragon mein lahu ki tarha jaari hain. Humari kitni nadaniyan aur lagzishain unhon ne nazar andaz keen. Jo rishta kabhi chand lectures, wards ya imtehanon sey jurra tha, aaj jaana keh woh eik mukammal tarbeeyat thi. Har ustad ne kisi khas tareekay sey humain eik mukammal aur kamyaab insaan banaya. Kisi ke pyar ne humain hosla diya aur kisi ke daant ne humain sahe rah ka tayun karwaya. Humarey bohot sey asataza umer bhar ke liye humare azeez doston ke shumaar mein rahein gay kyunke itna khaloos koi kisi ko bina rishtey ke nahin dai sakta. Shukr hai keh abhi humain yeh sunehra moka mayessar hai keh hum unsay apnee akeedat ka izhaar kar saktey hain. Shukr hai keh hum ne zindagi ke das bees saal guzarne ke baad yeh shaoor hasil nahin kiya, kyunke phir shayad hum yeh sab batein un sey na keh saktey. Humarey saath woh bhi log thai jo humaree is jazbateeyat sey nalaan thai, lekin humain apnee umer ke aakhri dor mein yeh khayal nahin sataye ga keh hum ne jin ki izzat o tazeem ki aur jin kee salamti ki duayein keen unsey kabhi iss ka izhar nahin kiya. Humara manna hai keh jab aap kisi ki kader jaanain to sab sey pehle unhain batain. Humari tarha humarey rehbar aur ustad bhi humarey khaloos ke talib hain. Barey borhey theek kehtey hain keh Ba adab ba naseeb aur bay adab bay naseeb.

Kon kehta hai keh fatima jinnah mein woh baat nahin jo baaki collegon mein hai. Hum ne parhai, khel, rafa e aama aur adab ke aiwanon mein kitney beshkeemat mawakey aur kamyabiyan paaye hain. Jaghein logon ko nahin log jaghon ko khas banatey hain. Jis ne oonchi parwaz karni ho woh kabhi hawa ko dosh nahin deta. takat e parwaz apne paron mein hoti hain, fiza mein nahin. lekin humarey dost yeh na samjhain keh hum salah mashwera daine lagey. Ajee nahin, koi madir e ilmi sey kitna pyar karta hai woh uski suwabdeed hai, mager humain utna hi khaloos aur pyar wapis milay ga, jitna hum dain gay. Hum ne apna mohabbat nama rakam kar diya fatima Jinnah medical college ke naam, aur bashart e zindagi humeesha apnee kamyabiyon ka sehra yahan ki taleem aur asataza ko daitey rahein gay. College ke chappe chappe pe humaree yadon ke nakoosh hain. Classes hon ya library, Auditorium ho ya dafatir, har jagha koi manoos chehra aur koi pyari si yaad daman khainchti hai. Kahan sey layein woh pal aur woh paikar! College ke dar o deewar humaree yadon ka woh hissa hain jinhain hum barha dekh payein gay aur humaree zaat mein saana laitey huay woh sunehrey din khamosh lamhon mein hamarey saath rahein gay. Meri yeh tehreer zamaney ki dhoop sey parrey asoodgi ke iss eik goshey ki nazar hai jisse hum fatima jinnah kehtey hain. F.J tujhey salam!