Rajesh Joshi/Pahad

Swapn agar aasman main the
To wai pahadon ke sabse qareeb the
Swapn agar mitti main the, rakh aur kuchli hui pattiyon main
to wai pahadon ke sabse qareeb the

Swapn agar kahin lukkar baith gaye the
To hamain poora bharosa tha
Ke wai
Pahadon main hi kahin chhipe honge

Ham swapnon ki talash main gaye the
Pahadon ki or
Aur ham jante the
Ke pahad dogle nahin hue hain
Wai hamari hifazat karte rahenge

Khurdare aur mitti main sane hue-wai pahad
Hamari hee tarah the
Yugon ke aaghaton main
Tooti hui chattanain samete
Jo abhi toote nahin the aur tane hue the
dahadte hue

Samay lagatar
Aik laplapate kode-sa gir raha tha
hamare shareer par
Aur hamne har naheen mani
Hamari ladai aur khoj
jaree thi
Hamain bharosa tha ke aik n aik din
Ham pankhon wale un neele ghodon ko
utar layenge
Jo har rat hamare bachchon kee neendon main
Aate hain aur chale jate hain
Aik n aik din
Chandi kee un ghantiyon ko khol layenge
Jo hamare swapnon ke swarg main
Run-jhunati hain

Hamain bharosa tha
Aur pahad tha hamara bharosa
Jo hamari roti aur namak ke liye
Hamain shahad aur namak deta tha

***