Kaalay Qaul

(Hassan Nisaar Say Ma’azrat Kay Saath)

Abba – zeest k warq per chann’d ek adhoori satrein, kuch mitti huwi, kuch mad’hamm, kuch bhoolai gaeein, kuch aansoo’oan say nehlaai gaeein, kuch dard bhari per ziaada tehleel kardi gaeein

Iman – woh Gosha, woh tijaarat jo kisi mehnat ya sanyaas k baad na mila, buss kissi gunahgaar k do gumnaam say aansoo is samander ko bhardein..

Siyaasatdaan – ek wehmi ka lailaaj bukhaar

Achay Siyaasatdaan – aisay nayaab jaisay aaj k Zamaanay mein Nubuwaat Moosa ko milay

Malabari Qaum – Iblees ki jamaat mein hoan to Kal Iblees Sajda raiz hojaaye

Waqt – woh dhoka, jo iskay dhokay mein raha paar hua, jo iskay dhokay mein na aaya so khud dhokay mein raha

Zeest – ek tohfa jissay kholnay ki naubat kamm ko milti hai, is say kamm jo is per ghaur bhi karein

Muhabbat – Jaan leva; Larki say ho ya Ma’abood say

Ilm – asal sakhaawat,

Jawaani – sub ney hai haarjaani, koi motorcycle per to koi kisi doar k taiz dhaar say

Burhaapa – naama e amaal

Maal – dunya ki nazar biwi per, biwi ki is per

Ghuroor – woh gard ka gola jo samjhay k sehra ussi k damm say hai, tab bhi na samjhay jab rayt k teeloan talay bhi hull hojaaye

Sharafat – who sikka jo zamaanaa e Hiroshima mein dabba dia gaya

Imaandaari – jis per ab bey Imaan falsafa or meyaar naap saktay hein

Sehat – woh raaz jissay cheen mein dhoondna hai

Ibaadat – ek dil farayb warzish c reh gai hai

Sachai – daadi zinda theein to bataaya karti theein kuch

Khuloos – ek charhaawa – rishtay lainay or dainay ka

Parda – niyyat per ho to wajib, na ho to bhi koi masla hee nahin

Zakhm – sub say ziaada paaye jaanay waali shay, dainay mein sub say halkay, saaya saath choar jaaye per zakhm nahin

Nafrat – ek qaabiliyyat jo kitaaboan mein harr giz na milay, aurtoan say mil sakti hai, shart yeh hai k anparh or faarigh hoan

Gheebat – paisha or pasand

Eid – Gheebat ka budget paish karnay ka din

Jahan Khizaan lambi ho wahan aanay waali bahaar bhi taweel hojaati hai, dekhna yeh hai k khizaan k saath chaltay ho ya shikway ki thokar mein chaal badal laitay ho

Bahaar aati wahan hai jahan khaali meydaan kushaada hoan, dil baray hoan to ranjish bhi ek kankar hai jis say bayr toar k khaaye jaa saktay hein.

Dil baray umeed say or maaf kardainay say hotay hein

Ghussa – baray bachoan ka mashghala per kismet ki haar shart hai

Aqalmandi – gehri soach mein hai

Sabzi – insaan ki haisiyat or auqaat, ameer ya ghareeb

Dosti – ek moqa, ek lottery, rishtay karnay karaana ka

Islam – kya hai? Islamabad mein hoga, pata karlo, yahan to nahi aaya

Siyaasi partiyaan – retired bachoan ki shatranj

Gol gappa – na hota to India say import karna parta

India – agar haqeeqat aashkaar hojaaye to hum 3 saal mein is say aagay hoan, per beydaari bhi funn hai jo Iqbal na choar k gaye

Balochistan – dil ka kya rang karoon, khoon e jigger honay tak..