The Nicotine Fingers

meray pass
ab koee khass baat nahin hai
meri unglion say tabakku ki badbuu aati hai
mera sar say garam-garam chaey ki khusbuu aati hai

meri raat main kitabain bhari paRi hain
vo meray chup chup dost, meri sahaleean hain
kuch bolti nahin sunti nahin
sab goongi aur behri hain
main bhi unki tarah
ab goonga sa behra sa hoon

jo idhar udhar k khyaal aatay hain
matlab ya be-matlabi hotay hain
unki shaeri karta rehta hoon
log chahay kuch bhi kahain
mujhay shair ya pagla bhi kahain
angrezi main shaeri karta rehta hoon

sirf ye dikhlannay k liyay k main
Shakespeare say koee kam nahin hoon
har mulk ka koee Shakespeare hota hai
main Pakistan ka Shakespeare hoon
(Pakistan k peers ko shake karta hoon!)

apnay hi khawaabon main apna hi
ek kaidi bana huaan hoon
jab rang bharay sapnay mujhay aatay hain
baarish ki choti choti boondain
meray sar par barasnay lagiti hain
aur main ek dum chaarpaaee say uth kar
apni aankahain malna shurro kar deta hoon
aur angrezi ki shaeri likhnay baith jaata hoon